“پاداشت لەپێناو دادپەروەری” خەڵاتی 10 ملیۆن دۆلار وەك پاداشت دەدات بە هەر كەسێك زانیاریی لەبارەی محەمەد جەعفەر قەسیڕەوە بدات.
قەسیڕ یەكێكە لە سەرەكیترین ئەو كەسانەی پارە دەدەن بە حزبوڵڵای لوبنانی و چەكی بۆ دابیندەكەن. وەزارەتی دەرەوەی ئەمریكا دەڵێت، محەمەد جەعفەر قەسیڕ لە قاچاخچێتی و پرۆسە چەكدارییەكانی حزبوڵڵادا بەشدارە.
بەپێی ڕاگەیەندراوی پرۆگرامی “پاداشت لەپێناو دادپەروەری” كە سەر بە وەزارەتی دەرەوەی ئەمریكایە و خەڵاتەكەی دیاریكردووە، قەسیڕ هاوكاریی حزبوڵڵا دەكات و لەگەڵ فەیلەقی قودسی سوپای پاسدارانی ئێران-دا كاردەكات و نەوتی ئێران دەفرۆشێت و سەرپەرشتیی ناردنی چەك و پارەی ئێرانی بۆ حزبوڵڵای لوبنانی دەكات.
پرۆگرامە ئەمریكییەكە لە تویتەر دەڵێت، ڕێگایەكی سەلامەت دەگرنەبەر بۆ ناردنی پارەكە بۆ ئەو كەسەی لەبارەی “قەسیڕ”ـەوە زانیارییان پێدەدات.
