ناڕەزایەتی و خۆپیشاندانی “تینووەكان” لە ئێران وەك ئەوەی چالاكوانان ئەو ناوەیان لێناوە درێژەی هەیە، ئەمەش دوای ئەوە دێت بەرپرسێكی وڵاتەكە دانینا بە كوشتنی گەنجێكی نێو خۆپیشاندەراندا.
ماوەی چەند ڕۆژێكە خۆپیشاندانی ناڕەزایی لە ناوچەی ئەهوازی ئێران بەهۆی قەیرانی كەمی ئاو درێژەی هەیە، بەتایبەت دوای كوژرانی خۆپیشاندەرێكی سەر بە پێكهاتەی عەرەب لە شاری شادگان-ی سەر بە پارێزگای خوزستان.
بەرپرسانی شارەكە دانیان بە كوژرانی گەنجەكەدا ناوە، بەبێ ئەوەی ئەو لایەنە ئاشكرابكات كە تەقەی لێكردووە، بەڵام چالاكوانان دوپاتیانكردەوە گەنجەكە لەكاتی هەوڵی بڵاوەپێكردنی خۆپیشاندەران لەسەر دەستی هێزە ئەمنییەكان كوژراوە، ڕووداوەكەش ئەوەندەی دیكە توڕەیی لە ناوچەكەدا بەدوای خۆیدا هێناوە.
ماڕەزایەتییەكە چەند ڕۆژێكە بەشێك لە شارەكانی ئەهواز و خوزستانی لە باشووری ڕۆژئاوای ئێرانی گرتووەتەوە، دژ بە كەمی ئاو، پڕۆسەی گواستنەوەی ئاوی خوزستان و ناچاركردنی دانیشتووانی پارێزگاكە بە “كۆچكردنی زۆرەملێ”.
