روانگەی سوری بۆ مافەكانی مرۆڤ رایگەیاند، لە پارێزگای لازقییە ئاڵۆزییەكان چووەتە دۆخێكی مەترسیدارەوە و رەشەكوژی بەرانبەر هاوڵاتیانی مەدەنی ئەنجامدراوە.
روانگەی سوری بۆ مافەكانی مرۆڤ لە راگەیەندراوێكدا بڵاویكردەوە، لە پارێزگای لازقییە و بەشێكی زۆری ناوچەكانی سەر بەو پارێزگایە، رەشەكوژی بەرانبەر هاوڵاتیانی مەدەنی ئەنجامدراوە و نزیكەی 158 كەس گولـلەباران كراون.
ئاماژەی بەوەشكردووە، بەشێكی زۆری ئەو كەسانەی كە لە گرژی و ئاڵۆزییەكانی پارێزگای لازقییە-دا كوژراون، هاوڵاتی مەدەنین و منداڵ و ژنیشیان تێدایە.
لەبارەی كوژراوانی نێوان هێزەكانی نوێی سوریا و چەكدارەكانی سەر بە پارێزگای لازقییە روانگەی سوری ئاشكراشیكردووە، 34 ئەندامی سوپای نیشتمانی و ئاسایشی گشتی لە پێكدادانەكاندا كوژراون و 42 كەسی دیكەش لە چەكدارەكانی لازقییە لە دەشتاییەكانی ئەو پارێزگایە و جەبلە كوژراون.
