یانەی ڕیاڵ مەدرید دانوستاندنەکانی بۆ نوێکردنەوەی گرێبەستی ڤینیسیۆز جونیۆر چڕ کردووەتەوە، یاریزانەکەش کێشەی لە ماوەی بۆندەکەدا هەیە.
ڕۆژنامەی بێلد سپۆرتی ئەڵمانی بڵاویکردووەتەوە، ئاست بەرزی و کاریگەری ڤینیسیۆز ئیدارەی یانەی ڕیاڵ مەدریدی ناچار کردووە گرێبەستێکی نوێی پێشکەش بکەن، گرێبەستەکەش “مێگا بۆند”ە و تاوەکو هاوینی 2028 بە یانەی شاهانەوە دەیبەستێتەوە.
لەو بارەیەوە یاریزانەکە ڕایگەیاندووە، “نزیکم لە نوێکردنەوەی بۆندەکەمەوە، لەسەر ڕێگەی دروستین و منیش لە باشترین و گەورەترین یانەی جیهانم، دەمەوێت وەک سێرجیۆ ڕامۆس بۆ ماوەیەکی درێژخایەن بەردەوام بم، وەک مارسێلۆ و کەریم بنزیمە و لوکا مۆدریچ.”
بەپێی سەرچاوەکە، گرێبەستە نوێیەکە زۆر بەهێزترە لەوانەی ڕابردوو، مووچەی یاریزانەکە بۆ 10 ملیۆن یورۆ بەرز دەکاتەوە، بەڵام ناوبراو کێشەی لە ماوەی بۆندەکەدا هەبووە کە تاوەکو 2028 و داوای کردووە لەو بارەیەوە ڕێککەوتنێک بە ڕەزامەندیی هەردوو جەمسەرەکە بکرێت.
