وەزارەتی تەندروستیی هەرێمی کوردستان ئاشکرایکرد، ئەمڕۆ شەممە یەکەم مردن بە تای خوێنبەربوون تۆمارکرا، کە گەنجێکی تەمەن 27 ساڵە و خەڵکی دەڤەری سۆرانە.
لە ڕاگەیەندراوێکدا وەزارەتی تەندروستیی هەرێمی کوردستان بڵاویکردەوە، یەکێک لە تووشبووانی تای خوێنبەربوون، کە گەنجێکی تەمەن 27 ساڵە و خەڵکی گوندی گۆڕەزی ناحیەی خەلیفانە لە دەڤەری سۆران گیانیلەدەستدا.
ئەو کەسەی ئەمڕۆ وەک یەکەم حاڵەتی تای خوێنبەربوون گیانیلەدەستداوە، پێشتر گومانلێکراو بووە و دوای گەیاندنی بەنەخۆشخانە پشتڕاستکراوەتەوە کە تووشبووی نەخۆشییەکەیە.
بەپێی ڕاگەیەندراوەکە، بەهۆی “کوشندەیی دۆخی تەندروستیی تووشبووەکە لەگەڵ ئەوەی چارەسەری وەرگرتووە، ئەمڕۆ گیانیلەدەستداوە و وەک یەکەم حاڵەتی مردن بەو نەخۆشییە لە هەرێمی کوردستان تۆمارکرا”.
وەزارەتی تەندروستی داوا لە هاوڵاتییان دەکات پابەندی ڕێنماییەکانی خۆپارێزی بن بۆ دووربوون لە تووشبوون بە نەخۆشیی تای خوێنبەربوون.
