وەزارەتی ناوخۆی هەرێمی کوردستان بڕیاریدا، ئەو کارمەندانەی حکومەت کە ئۆتۆمبێلی حکومییان لایە دەبێت خۆیان سزای تیژرەوی و سزاکانی دیکەی سەرپێچیی هاتوچۆ بدەن، نەک فەرمانگەکانیان.
بەپێی نوسراوێکی وەزارەتی ناوخۆ کە بۆ ئەنجومەنی وەزیران نێردراوە و ڕەزامەندیشی لەسەردراوە، بڕیاری خەرجکردنی سزاکانی تیژڕەوی و سەرجەم سزاکانی دیکەی هاتوچۆ لەلایەن ئەو کارمەندانەی وەزارەتەکە کە ئۆتۆمبێلی حکومییان لایە، لەپێناو پابەندبوونیانە بە ڕێنماییەکانی هاتوچۆوە.
لە بڕیارەکەدا هاتووە، “لەپێناو پابەندبوون بە ڕێنوێنییەكانی هاتووچۆ و بۆ ئەوەی ئەو شۆفێرانەی ئۆتۆمێلەكانی میری بەكاردەهێنن، پابەندی ڕێنوێنییەكان بكەن، نابێت نووسراوی لێخۆشبوون لە سزاكانی تیژڕەوی و سزاكانی سەرپێچیی هاتووچۆ بەرز بكرێتەوە، بەڵكو شۆفێرەكان پێویستە پابەند بكرێن، كە هەركەس سەرپێچی بكات خۆی سزاكە بدات، نەك دامەزراوەكانی میری”.
ناوەڕۆکی نوسراوەکە لەلایەن میدیایی فەرمیی پارتییەوە بڵاوکراوەتەوە و بەوپێیە، ئەنجوومەنی وەزیران دووپاتیكردووەتەوە، ئەو شۆفێرانەی ئۆتۆمبێلی حکومییان لایە، دەبێت پابەندی ڕێنماییەکانی سەلامەتیی خۆیان و سەلامەتیی گشتی بن.
