توێژەرێكی ڕێكخراوی تەندروستیی جیهانی، وەڵامی ئەو بۆچوونە دەداتەوە كە پێیوایە 20 جارێك ڤایرۆسێك بڵاودەبێتەوە. دەڵێت، ئاژەڵ سەرچاوەی 70%ی نەخۆشییە گواستراوەكانە.
دكتۆر ڕیچارد برینان بەڕێوەبەری فریاكەوتن لە نووسینگەی هەرێمیی ڕێكخراوی تەندروستیی جیهانی ڕایگەیاند، ئەوەی كە دەوترێت هەر 20 ساڵ جارێك ڤایرۆسێك سەرهەڵدەدات، بۆچوونێكە ناكرێت پشتی پێببەسترێت و دەڵێت، ئەوە تەنها ڕێككەوتە.
توێژەرەكە ئەمڕۆ چوارشەممە لە كۆنگرەیەكی ڕۆژنامەوانیدا ئاشكرایكرد، “70%ی نەخۆشییە گواستراوەكان لە ئاژەڵەوە سەرچاوە دەگرن و بڵاودەبنەوە، وەك ئیبۆلا و سارس و هەندێك لە جۆرەكانی ئەنفلۆنزا و كۆرۆنا. بەمدواییانەش گواستنەوەی نەخۆشی لە ئاژەڵەوە گۆڕانی بەسەردا هاتووە و بە شێوەی گۆڕاو دەگوازرێنەوە بۆ مرۆڤ، ئەوەش زیانی بە زۆرێك لە مرۆڤەكان گەیاندووە، چونكە هەموومان لەبەردەم ئەگەری تووشبوونداین”.
بەپێی وتەی دكتۆر ڕیچارد، لەم سەردەمەدا بڵاوبوونەوەی پەتا و نەخۆشی وەك گۆڕانی ئاووهەوای لێهاتووە، بەو مانایەی نەخۆشییەكان زۆربوون و ڕێگریكردن لە سەرهەڵدان و بڵاوبوونەوەیان ئاسان نییە.
