ژنێکی ئەمریکی ماوەی 61 رۆژە گورچیلەی بەرازی بۆ چێندراوە و لە ئێستادا تەندروستیی بەرەو چاکبوونەوە دەڕوات.
توانا لونی دانیشتووی ویلایەتی ئەلەبامای ئەمریکایە ماوەی چەند مانگێک بوو بەهۆی لەکارکەوتنی گورچیلەیەوە دەیناڵاند دوای ئەوەی پزیشکەکان بێهیوابوون لەوەی بتوانن گورچیلەی مرۆڤێکیان دەستبکەوێت و بۆی بچێنن بڕیاریاندا گورچیلەی بەرازی بۆ بچێنن.
نەشتەرگەری گواستنەوەی گورچیلەکە لە یەکێک لە نەخۆشخانەکانی نیویۆرک ئەنجامدرا بە وتەی پزیشکەکان، نەشتەرگەرییەکە سەرکەوتوو بووە رۆژ بەرۆژ تەندروستیی نەخۆشەکە بەرەوباشتر دەچێت و لە ئێستادا بیرلەوە دەکەنەوە لە ماوەی مانگێکدا نەخۆشەکە بنێرنەوە ماڵەوە.
توانا لونی تەنها کەس نییە کە گورچیلەی بەرازی بۆ چێندرابێت، پێشتر هەمان نەشتەرگەری بۆ چوار کەسی دیکە ئەنجامدراوە، بەڵام هیچ کەسێکیان دوای نەشتەرگەرییەکە تەمەنیان نەگەیشتووەتە دوو مانگ و گیانیان لەدەستداوە.
لونی لە بارەی سەرکەوتنی نەشتەرگەرییەکەی دەڵێت، “من ژنێکی سەرسوڕهێنەرم، ئەمە سەرەتایەکی نوێیە بۆ ژیانم”.
لەگەڵ پێشکەوتنی لایەنی پزیشکی لە جیهاندا و بەرەپێشچوونی نەشتەرگەرییەکانی چاندنی ئەندامەکانی جەستە، لە ئێستادا جیهان بەهۆی کەمی بەخشەری مرۆڤ دەناڵێنێت، ئەمەش هانی پزیشکانی داوە بەدوای جێگرەوەی ئەندامەکانی جەستەی مرۆڤ بگەڕێن، کە ئەویش ئەندامەکانی ئاژەڵە.
