یەکێتیی نیشتمانیی کوردستان، چێوەی ھەماھەنگیی شیعەكان و ھاوپەیمانیی عەزم جەخت لە پێكهێنانی حكومەتێكی بەهێز دەكەنەوە كە توانای ئەنجامدانی چاكسازیی هەمەلایەنەی لە دامەزراوەكانی دەوڵەتدا هەبێت.
ئێوارەی ڕۆژی سێشەممە، 7 حوزەیرانی 2022 یەکێتیی نیشتمانیی کوردستان بە سەرۆکایەتیی بافڵ جەلال تاڵەبانی و چێوەی ھەماھەنگی و ھاوپەیمانیی عەزم بە سەرۆکایەتیی موسەنا سامەڕائی کۆبوونەوە.
بەپێی ڕاگەیەندراوی كۆبوونەوەكەش، لە کۆبوونەوەکەدا بارودۆخی گشتیی سیاسی گفتوگۆی لەبارەوەکرا و ڕێگا چارەکان بۆ بارودۆخێکی باشتر بە بەشداریی ھێزەنیشتمانییەکانی دیکە خرایەڕوو.
باسلەوەشكراوە، بەشداربووانی کۆبوونەوەکە داوایانکرد کە پێویستە حکومەت ئەرکەکانی لە ئەستۆ بگرێت بەرامبەر بە ھاوڵاتییان و ھەوڵی باشترکردنی خزمەتگوزارییەکان لە ھەموو وڵات بدات.
لە بەشێكی دیكەی ڕاگەیەندراوەكە هاتووە، لایەنەکانی بەشداربووی کۆبوونەوەکە ھاوڕابوون لەسەر بایەخی ھاوئاھەنگیکردنی ھەڵوێستەکان لەپێناو ڕووبەڕووبوونەوەی ھەموو ئەو پیلانانەی ھەڕەشە لە سەقامگیری پرۆسەی سیاسی و ئەزموونی دیموکراسی لە وڵات دەکەن.
ھەروەھا جەختکرایەوە لەسەر پێویستی بەردەوامبوونی ھەوڵەکان بۆ بەدیھێنانی کارە لە پێشینەکان لە پێکھێنانی حکومەتێکی بەھێز کە توانای ئەنجامدانی چاکسازی ھەمەلایەنەی لە دامەزراوەکانی دەوڵەت ھەبێت و زامنی مافی ھەموو ڕۆڵەکانی گەلی عێراق بکات بە پێی یاسا و دەستوور.
