بەپێی ڕۆژنامەی گاردیان، ئەو بۆچوونە زاڵەی مرۆڤ بەر لە 10 هەزار ساڵ مریشکی بەخێوکردووە و خواردوویەتی، ڕاست نییە.
توێژینەوەیەکی هەریەک لە زانکۆکانی ئێکستەر، ئۆکسفۆرد و کاردیڤ دەریخستووە، مرۆڤەکان لە 1500ـی پێش زایینەوە هەڵسوکەوتیان لەگەڵ مریشکدا دەستیپێکردووە.
توێژەران لەڕێی کاربۆنەوە پشکنینیان لە 600 جێگەی جیاجیای 89 وڵات کردووە بۆ کۆنترین پاشماوەکانی مریشک و بۆیاندەرکەوتووە، کۆنترین دەرکەوتنی ئەم زیندەوەرە دەگەڕێتەوە بۆ ساڵانی 1650 بۆ 1250ـی پێش زایین، لە گوندی پان نون وات-ی ناوەڕاستی تایلاند-دا.
جگە لەمە، مریشک لە ساڵانی 800ـی پێش زایینەوە گەیشتووەتە ئەوروپا.
لە توێژینەوەکەدا هاتووە، مرۆڤ لە کاتی چاندنی برنجی وشکدا مریشکیان دۆزیوەتەوە و پێشتر لەسەر درەختەکان ژیاون، بەڵام بەهۆی برنج و خواردنییەوە دابەزیونەتە سەر زەوی.
