کارلۆس تیڤێز دوای هەڵوەشاندنەوەی گرێبەستەکەی لەگەڵ یانەی بوکا جونیۆرز، لە ناوەڕاستی ساڵی ڕابردووەوە هیچ یارییەکی فەرمی نەکردووە و دواجار وازهێنانی ڕاگەیاند.
ئەستێرە ئەرجەنتینییە تەمەن 38 ساڵەکە قسەی بۆ بەرنامەی “ئەنیمالیس سوێلتۆس” کردووە و ڕایگەیاندووە، “وازم هێناوە، لەوە دڵنیا بن، ئۆفەرێکی زۆرم پێگەشت، بەڵام وەک یاریزانێک هەموو شتێکم پێشکەش کرد و ئەمە کۆتاییە.”
لە درێژەی قسەکانیدا دەڵێت، “دوای کۆچی دوایی باوکم دۆخەکە سەخت بوو، ڕۆژێک لە خەو هەستام و بە هاوسەرەکەمم وت، نامەوێت جارێکی دیکە یاری بکەمەوە، ڕاستەوخۆ تەلەفۆنم بۆ ئادریان کرد کە بریکارم بوو و پێم وت، گوێ بگرە، جارێکی تر یاری ناکەمەوە، وازهێنان ڕادەگەیەنم.”
تێڤێز دەڵێت، “وازم هێنا، چونکە هاندەری ژمارە یەکم لەدەستدا، تەمەنم هەشت ساڵ بوو و باوکم یەکەم کەس بوو کە هات بۆ چاودێریکردنم.”
ئاماژەی بەوەش کردووە، هیچ کەسێکی دیکە وەک باوکی نابێتە پاڵپێوەنەر بۆی، بۆیە وازهێنانی بە تاکە چارەسەر زانیوە.
