بافڵ جەلال تاڵەبانی سەرۆكی یەکێتیی نیشتمانیی کوردستان، لە یادی 47 ساڵەی دامەزراندنی یەكێتیدا بەڵێندەدات تا ساڵیادی داهاتووی حزبەكە یەک ملیۆن نەمام لە ناوچە جیاجیاکانی کوردستان بچێنن و دەڵێت، “پشتیوانی گەنجان دەبین و خزمەتگوزارییەکی شایستە و داهاتوویەکی سەقامگیر بۆ خەڵکی کوردستان دەستەبەردەکەین”.
لە پەیامێكدا كە بە بۆنەی یادی 47 ساڵەی دامەزراندنی یەكێتی و (46)ـەمین ساڵەی ھەڵگیرساندنی شۆڕشی نوێوە بڵاویكردەوە، بافڵ جەلال تاڵەبانی سەرۆكی یەکێتیی نیشتمانیی کوردستان ڕایگەیاند، “لە دوای دیداری یەکێتییەوە حزبەکەمان دەچێتە قۆناغێکی نوێی کاری سیاسییەوە. نوێبوونەوە و چاکسازی بنەمای کارکردنمان دەبێت و داڕشتنەوەی سیاسەتێکی نوێ بۆ بونیادنانی داهاتوویەکی سەقامگیر و حوکمڕانییەکی تەندروست کاری لە پێشینەمان دەبێت”.
سەرۆكی یەكێتیی نیشتمانیی كوردستان دەڵێت، “ئێمە بەڵێنمان بە خەڵکی سەربەرزی کوردستان داوە خزمەتیان بکەین و قەرەبووی ساڵانێکی پڕ لە قەیران و سەختییان بۆ بکەینەوە. ئەمەش هاوکاری و هەماهەنگی هەموو لایەکمانی پێویستە و دەبێت لە ئاست ئەو بەرپرسیارێتییە مێژوویی و نیشتمانییەدا بین” و جەختدەكاتەوە كە گفتوگۆ و لێکتێگەیشتن لەگەڵ هێز و لایەنەکانی هەرێمی کوردستان، دەکەنە بنەمای کارکردن “تاوەکو هەموومان پێکەوە بتوانین خزمەتگوزارییەکی شایستە و داهاتوویەکی سەقامگیر بۆ خەڵکی کوردستان دەستەبەربکەین”.
بافڵ جەلال تاڵەبانی ڕاشیگەیاندووە، “لە ڕووبەڕووبوونەوەی گەندەڵی بەردەوام دەبین و ڕێگری لە بەهەدەردانی سامانی گشتی دەکەین. پشتیوانی گەنجە دڵسۆزەکانمان دەبین و هاوکاریان دەبین بۆ پەرەپێدان و گەشەکردنی تواناکانیان. سروشتی جوانی کوردستان و ژینگەمان لەیادنەکردووە و دەمەوێت لێرەوە بۆ هەموولایەکی ڕابگەیەنم لە ئەمڕۆوە تاوەکو یادێکی تری دامەزراندنی یەکێتی، یەک ملیۆن نەمام لە ناوچە جیاجیاکانی کوردستان دەچێنین و سەوزکردنی کوردستانمان لە ئەستۆ دەگرین”.
