محەممەد سەڵاح لە تەکتیکی دانوستاندنەکانی یانەی لیڤەرپوڵ تووڕەیە و بە ئەگەری یاریکردن بۆ یەکێک لە دوو یانە زەبەلاحەکەی شاری مانچستەر هەڕەشە دەکات.
ماڵپەڕی “ئاتلێتیک” لە زاری کەسانی نزیکی سەڵاحەوە ئاشکرای کردووە، یاریزانەکە تەمەنی 29 ساڵە و لە ڕیزەکانی “ڕێدز” باشترین ئاستی پێشکەش کردووە، پێی وایە دەبێت مامەڵەیەکی جیاواز و شایستەی لەگەڵدا بکرێت.
لە بەرامبەردا بەڕێوەبەرانی لیڤەرپوڵ لە نوێکردنەوەی بۆندەکەی دواکەوتوون و ئامادەنین مەرجەکانی بۆ جێبەجێ بکەن.
گرێبەستی سەڵاح و لیڤەرپوڵ تەنها 12 مانگی ماوە بۆ کۆتاییهاتن، تاوەکو ئێستا لەسەر فۆرمێکی نوێ ڕێککەوتنیان نەکردووە و بگرە کەلێنێکی گەورە لەنێوان جەمسەرەکاندا هەیە.
سەرچاوەکە نووسیویەتی، لێپرسراوی کارەکانی سەڵاح بە ئیدارەی ڕێدزی ڕاگەیاندووە، کە ئەگەر لە ماوەی داهاتوودا گرێبەستەکەی نوێ نەکرێتەوە، تاوتوێی بۆندی یانە داواکارەکان دەکات و ناشیەوێت خولی نایابی ئینگلیزی بەجێبهێڵێت، ئەوەش بە واتای ئەگەرەکانی یاریکردنی دێت بۆ یانەکانی مان سیتی، یاخود مانچستەر یونایتد.
