ڕاگەیەندراوی كۆتایی یە‌كە‌م دیداری ساڵانەی یەكێتی

لیژنەی باڵای دیداری یەکێتی كۆتا ڕاگەیەندراوی لەبارەی كارەكانی دیدارەكە بڵاوكردەوە و دەڵێت، “ئەگەر ساڵان بۆ یادی دامەزراندنی یەکێتیی تەنھا ئاھەنگمان دەگێڕا و یادی شەھیدان و مامی رێبەرمان دەکردەوە، ئەوە ئەمساڵ جیاوازتر پێشوازیمان لە یادی دامەزراندنی حیزبە تێکۆشەرەکەمان کردەوە”.

لە ڕاگەیەندراوەكەی لیژنەی باڵای دیدادری یەكێتی باسلەوەشكراوە، چ ئاھەنگێک لەوە خۆشتر و جوانتر و باشترە کە لەڕێی دیداری یەکێتییەوە بڕیاری پێداچوونەوە بە سیاسەت و داڕشتنەوەی روئیا و پلانی نوێ و گونجاو لەگەڵ ویست و داواکاریی کۆمەڵانی خەڵکی کوردستانمان داوە.

دەقی ڕاگەیەندراوەكە:

ڕاگەیەندراوی کۆتایی یە‌كە‌م دیداری ساڵانەی یەکێتیی

ھەڤاڵان سڵاوی کۆتایی ھاتن و سەرکەوتنی دیداری یەکێتیتان لێ بێت..

ئەگەر ساڵان بۆ یادی دامەزراندنی یەکێتیی تەنها ئاهەنگمان دەگێڕا و یادی شەهیدان و مامی رێبەرمان دەکردەوە، ئەوە ئەمساڵ جیاوازتر پێشوازیمان لە یادی دامەزراندنی حیزبە تێکۆشەرەکەمان کردەوە.

چ ئاهەنگێک لەوە خۆشتر و جوانتر و باشترە کە لەڕێی دیداری یەکێتییەوە بڕیاری پێداچوونەوە بە سیاسەت و داڕشتنەوەی رۆئیا و پلانی نوێ و گونجاو لەگەڵ ویست و داواکاریی کۆمەڵانی خەڵکی کوردستانمان داوە.

چ یادکردنەوەیەکی شەهیدەکانمان لەوە شایستەترە کە بریارمان داوە دیداری یەکێتی بۆ پێداچوونەوە بە سیاسەت و هەڵوێست و داڕشتنەوەی دید و رۆئیامان بکەینە نەریتێکی ساڵانە بۆ ئەوەی یەکێتی وەک هەمیشە پێشڕەوی نوێگەری بێت لە کوردستان.

هەروەها چ رێزلێگرتنێک لە کادر و تێکۆشەرە دێرین و نوێیەکانمان لەوە راستگۆ و بە نرخترە کە لە دیداری یەکێتیدا راستەوخۆ بەشداردەبن لە دیاریکردنی سیاسەت و هەڵوێستی حیزبەکەیان.

پێمان وایە کۆتاییهاتنی سەرکەوتووانەی دیدار و چەسپاندنی دیدار وەک نەریتێکی ساڵانە نوێکردنەوەی راستەقینەی یەکێتییە و بەمەش لەلایەکەوە جەژنی ئەمساڵمان بووە بە دوو جەژن و لەلایەکیتریشەوە بەم خۆنوێکردنەوەیە بە باشترین شێوە یادی دامەزراندنی حیزبەکەمان و یادی ئەو تێکۆشەرانەمان کردۆتەوە کە گیانی شیرینی خۆیان لەپێناو ئامانجەکانی یەکێتی بەخشی، یان بە یەکێتییەوە ماندووبوون و رەنجیان بۆ کێشاوە.

ھەڤاڵان دەمێک ساڵ بوو یەکێتی پێویستی بەوەبوو لە دەرەوەی دروشم خۆی نوێ بکاتەوە، دەمێک ساڵ بوو پێویستی بەوەبوو بۆ داڕشتنەوەی سیاسەت و رۆئیا بگەڕێتەوە بۆ ناو کادر و تێکۆشەرەکانی خۆی و بەشدارییان پێ بکات، ئەمساڵ لەم دیدارە رەسمییە بەسەرپەرشتی ھەڤاڵ قوباد تاڵەبانی ، ئەم هەنگاوە گرنگەمان دەست پێکرد. ئەمساڵ بە کردار سەلماندمان کە یەکێتی حیزبی کادرانە و رۆڵی کادران لەمەودوا لەناو حیزبدا زیاتریش دەبێت.

کاتێک حیزبێک دەبێتە حیزبی کادران و بە هەزاران کادر لە شار و ناوچەی جیاوازەوە بەشدار دەبن لە دانانی سیاسەتی حیزبدا، بە دڵنیاییەوە ئەو حیزبە دەبێتەوە بە حیزبی کۆمەڵانی خەڵکیش، چونکە کادرانی یەکێتی هەڵقوڵاوی ناو جەماوەرن و هەڵگری خواست و داواکاری خەڵکن.

یەکێتی کە لەسەر بنەمای دوو چەمکی کوردایەتی و دادپەروەری کۆمەڵایەتی دامەرزاوە، لەمەودوا هەردوو بنەماکە لەخۆیدا بەهێزتر دەکات. لەم قۆناغەدا کە وڵاتەکەمان بە دەست کێشەی دادپەروەری کۆمەڵایەتییەوە دەناڵێنێت، بۆ لەمەودوا یەکێتی لە هەموو سیاسەت و هەڵوێستەکانیدا پرسی دادپەروەری کۆمەڵایەتی بە بنەما دەگرێت و پەرەی پێ دەدات.

سەبارەت بە پرسی حکومڕانیش، وەک سەرۆک بافڵ جەلال تاڵەبانی رایگەیاند پێشتر کەموکوڕی زۆرمان هەبووە و هەڵەی گەورە کراوە، بەڵام چیتر یەکێتی نەک هەر رێگە بە دووبارەبوونەوەی ئەم هەڵانە نادات، بەڵکو یەکێتی لەسەر هەردوو ئاستی کوردستان و عێراقیش دەبێتە حیزبی پێشەنگ بۆ راستکردنەوەی رێڕەوەی حکومڕانی و بونیادنانی حکومڕانیی تەندروست.

حکومڕانی تەندروست لە روانگەی ئێمەوە تەنها حکومڕانییەکی شەفاف و دەستپاک نییە، بەڵکو حکومڕانییەکی زانستیشە، بەو واتایەی نابێت بەپێی حەز و باوەڕی تاکەکەسی هیچ هەنگاوێک بهاوێژرێت، بەڵکو هەر پلان و سیاسەتێک پێشتر دەبێت لەرووی زانستییەوە لەلایەن خەڵکی پسپۆڕ و ئاکادیمییەوە داڕێژرابێت و لە ئەنجامەکەی تا رادەیەکی زۆر دڵنیابین، بۆ ئەوەی چیتر ژیانی خەڵک بەهۆی هەڵەی حکومڕانییەوە نەکەوێتە مەترسییەوە.

لە کۆتاییدا جارێکیتر یادی دامەزراندنی یەکێتی و کۆتاییهاتنی سەرکەوتووانەی دیداری یەکێتی لە هەموو هەڤاڵان و جەماوەری یەکێتی پیرۆز دەکەین و دەستی ھەموو ھەڤاڵانی یەکێتیی بەگەرمی دەگوشین و پێیان دەڵێین دەستتان خۆش و ماندوو نەبن و سوپاس بۆ ھەمووتان

پێکەوە بەرەو جێبەجێکردنی راسپاردەکانی دیدار، دوای پەسەندکردنی لە ئەنجومەنی سەرکردایەتی، و گەشانەوەی بەردەوام و تاسەری یەکێتییە تێکۆشەرەکەتان.

دیدارتان باش و ھەمیشە سەرفراز بن

لیژنەی باڵای دیداری یەکێتیی

٣١-٥-٢٠٢٢

بابەتی پێشتر

وتارێكی نووسەرێكی كورد كاندیدە بۆ بەدەستهێنانی خەڵاتێكی یەكێتیی ئەوروپا

بابەتی دواتر

وردەكاریی پێكدادانی نێوان پێشمەرگە و سوپای عێراق ئاشكرادەكرێت

بابەتی پەیوەندیدار
Total
0
Share