شەوی ڕابردوو لە ئەنجامی پێکدادانی دوو ئۆتۆمبیل لەسەر ڕێگای دەربەندیخان – سلێمانی لە نزیک گوندی بیرکێ 8 کەس بریندار بوون، کە 5 لە بریندارەکان ژنن.
ڕێژەن بورهان، بەڕێوەبەری هاتوچۆی دەربەندیخان بە تۆڕی میدیایی ئێستای ڕاگەیاند، “ڕووداوەکە کاتژمێر 12ی شەوی ڕابردوو لە نێوان دوو ئۆتۆمبیلی جۆری ( هوندای ئەلەنترا ) و ( کیایەکی دوتەنی ) ڕوویداوە و بەهۆیەوە 8 برینداری لێکەوتووەتەوە، کە بەشێک لە بریندارەکان ژن و منداڵن”.
بە وتەی بەڕێوەبەری هاتوچۆی دەربەندیخان ڕووداوەکە بەهۆی تێپەڕاندنی هەڵەی یەکێک لە ئۆتۆمبیلەکانەوە بووە و خۆی کێشاوە بە ئۆتۆمبیلی بەرامبەریدا، بەهۆیەوە ئەو ژمارە زۆرە لە برینداری لێکەوتووەتەوە و هەردوو شۆفێری ئۆتۆمبیلەکەش بە سەختی برینداربوون.
بەپێی زانیارییەکانی بەڕێوەبەری هاتوچۆی دەربەندیخان لە ڕووداوەکەدا 5 ژن و منداڵێک و دوو پیاو برینداربوون کە بەڕەگەز عەرەبن.
