ئەمڕۆ سێشەممە نرخی نەوت بە ڕێژەیەكی بەرز زیادیكرد و گەیشتە 123.28 دۆلار بۆ هەر بەرمیلێك.
بەرزبوونەوەكە هەردوو جۆری برێنت و تەكساس دەگرێتەوە، یەكەمیان بەرمیلێكی بە 123.28 دۆلار مامەڵەی پێوەدەكرێت و نەوتی خاوی تەكساس بەرمیلێكی بە 118.49 دۆلارە و لە ڕۆژی هەینیی ڕابردووەوە 3.42 دۆلار سەرباری نرخەكەی بووە.
بەرزبوونەوەی لەناكاوی نرخی نەوتی خاو، دەگەڕێتەوە بۆ كۆدەنگییەكی یەكێتیی ئەوروپا كە بڕیاریدا تا كۆتایی ئەمساڵ نەوتی هاوردەكراو لە ڕوسیاوە كەمبكاتەوە، ئەوەش ترسی لە كەمبوونەوەی خستنەڕووی نەوت لە بازاڕەكاندا دروستكردووە لە كاتێكدا خواست لەسەری زۆرە.
بڕیارەكەی یەكێتیی ئەوروپا سەرەتاییە و دوا بڕیاری وڵاتانی سەر بەو یەكێتییە نییە، بەڵام گۆڕانكاری لە بازاڕی نەوتدا دروستكردووە بەو پێیەی ڕێككەوتنە سەرەتاییەكە بە جۆرێكە دەستبەرداری 90%ی نەوتی ڕوسیا ببن.
دوێنێ نرخی بەرمیلێک نەوتی خاوی برێنت بەرزبووەوە بۆ 120.6 دۆلار، ئەو بەرزبوونەوەیە بە بڕی 80 سەنت و ڕێژەی 0.67% بوو، بەڵام بەرزبوونەوەكەی ئەمڕۆ زیاترە لە سێ دۆلار و 20 سەنت.
