بەڕێوەبەری چاودێری و بازرگانيی سلێمانی ڕایدەگەیەنێت، نرخی ماسی بە بەراورد بە مانگی ڕابردوو زیاتر گرانبووە و نرخی یەك كیلۆ ماسی گەیشتووەتە 9 هەزار و 500 دینار بۆ 10 هەزار دینار.
سۆران عەبدولغەفور، بەڕێوەبەری چاودێری و بازرگانيی سلێمانی لە لێدوانێكدا بە تۆڕی میدیایی ئێستای ڕاگەیاند، بەر لە وەرزی قەدەغەكردنی ماسی لە سەرەتای ئەمساڵدا نرخی یەك كیلۆ ماسی 3 هەزار و 500 دینار بۆ 4 هەزار دیناربووە، بەڵام بەهۆی وەرزی قەدەغەكردنی ماسی نرخەكەی بەرزبووەوە مانگی ڕابردوو نرخی یەك كیلۆ ماسی گەیشتە 8 هەزار و 500 دینار.
ئاشكرایكرد، لەئێستادا نرخی یەك كیلۆ ماسی گەیشتووە 9 هەزار و 500 دینار بۆ 10 هەزار دینار و بەهۆی مەترسی بڵاوبوونەوەی نەخۆشییەوە كەمتر لە دەرەوە بەرهەمی ماسی دەهێندرێت.
بەڕێوەبەری چاودێری و بازرگانیی سلێمانی وتی، ” ئەو حەوزی ماسییانەی كە لەناوخۆدا هەن پێویستیی ناوخۆ پڕناكەنەوە كاتێك هەر بەرهەمێك كەمبكات ڕێگەی پێدەدرێت لە دەرەوە هاوردەبكرێـت”.
