تۆم كروز ئەكتەری دیاری هۆڵیوود دەڵێت، لە ژیانیدا ڕۆژێك پشووی نەبووە و هەمیشە سەرقاڵی كاری هونەری بووە.
ماڵپەڕی “GEO”ی ئەمریكی لە زاری پاڵەوانەكەی زنجیرە فیلمی “Mission: Impossible”ـەوە بڵاویكردەوە، تۆم كروز هەمیشە و زۆربەی كاتەكانی ژیانی لە شوێنی وێنەگرتنی فیلمەكانیدا بەسەربردووە و هیچ ڕۆژێكی پشووی نەبووە.
تۆم كروز ئێستا لە فەرەنسایە بۆ بەشداریكردن لە فێستیڤاڵی كان و ئەوەی بە پشوو ناوبردووە و ڕایگەیاندووە، “ئێستا لە پشوودام، هەر ڕۆژێك سەرگەرمی وێنەگرتنی فیلم نەبم، ئەو ڕۆژە بە پشوو دەزانم تەنانەت ئەگەر بە درێژایی ڕۆژەكە چاوپێكەوتنی ڕۆژنامەوانی ئەنجامبدەم”.
ماوەیەكە تۆم كروز ڕۆژانە كۆنگرەی ڕۆژنامەوانی ڕێكدەخات و ڕیكلام بۆ فیلمە نوێیەكەی دەكات بە ناوی “Top Gun Maverick”، بەڵام وەك خۆی دەڵێت، گەڕان بە سەرانسەری جیهان و وێنەگرتنی فیلم خەونی خۆی بووە، بۆیە سەرباری ئەوەی پشوونادات، ڕۆژەكانی كاركردنی وەك پشوو دەبینێت.
