ئیتاڵیا بەنداوێك لە عێراق دروستدەكات و لەگەڵ دیاریكردنی شوێنەكەیدا، ئامانجەكەی ئاشكرادەكات.
خالد بەتال نەجم وەزیری پلاندانانی عێراق و ماوریتسۆ كریكانتی باڵیۆزی ئیتاڵیا لە عێراق لەسەر جێبەجێكردنی دوو پڕۆژە ڕێككەوتن، پەرەپێدانی شاری مێژوویی ئوور و دروستكردنی بەنداوێك لەسەر شەتی عەرەب.
ئامانج لە دروستكردنی بەنداوەكە جگە لە گلدانەوەی ئاو، بەرگرتنە لە زیاتر هەڵكشانی ئەو شەپۆلە خوێیەی مەترسی لەسەر بەشێك لە خاكی عێراق و زەویی كشتوكاڵی دروستكردووە و وایكردووە بە كەڵكی كشتوكاڵ نەیەن، وەك ڕاگەیەندراوی كۆبوونەوەی نێوان وەزیر و باڵیۆزەكە ئاشكرایكردووە.
شاری ئوور كە شوێنێكی مێژوویی و شوێنەوارێكی دێرینی پارێزگای زیقارە و مێژووەكەی دەگەڕێتەوە بۆ نزیكەی حەوت هەزار ساڵ بەر لە ئێستا، ئیتاڵیا نۆژەنیدەكاتەوە و پەرە بە شێوە و ئەدگارەكانی دەدات، ئەوەش لە چێوەی ئەو هەڵمەتە نێودەوڵەتییەی ئاوەدانكردنەوە و پەرەپێداندایە كە وڵاتان بەڵێنیان بە عێراق داوە.
