موقتەدا سەدر ڕێبەری ڕەوتی سەدر پێشوازی لە بڕیاری دادگای فیدراڵی دەكات بۆ پەسەندكردنی ئەنجامەكانی هەڵبژاردن، پێكهێنانی حكومەتی زۆرینەش دووپاتدەكاتەوە.
لە یەكەم كاردانەوەی فەرمی و هەڵوێستیدا دوای پەسەندكردنی ئەنجامەكانی هەڵبژاردنی ئەنجومەنی نوێنەران لەلایەن دادگای باڵای فیدراڵییەوە، موقتەدا سەدر ڕێبەری ڕەوتی سەدر پەیامێكی بڵاوكردەوە و ڕایگەیاند، “سوپاس بۆ هەموو ئەوانەی بەشداربوون لەو بۆنە دیموكراتییە نیشتمانییەدا، لەوانە دەسەڵاتی باڵای دادوەری و بەتایبەت برام فائیق زێدان و دادگای فیدراڵی”.
لە پەیامەكەیدا كە كەمێك لەمەوبەر لە تویتەر بڵاویكردەوە، سەدر “سوپاسی كۆمسیۆنی باڵای سەربەخۆی هەڵبژاردنەكان و جێنین پلاسخارت و هەموو هاوبەشان و گەلی عێراق دەكات لەپای ئارامگرتنی و سوپاسی مەرجەعییەتی باڵای شیعەكان دەكات”.
لە كۆتایی پەیامەكەیدا ڕێبەری ڕەوتی سەدر داوای پاراستنی ئارامی و ئاشتی دەكات و داواكارە حكومەتی “زۆرینەی نیشتمانی” پێكبهێنرێت كە خزمەتگوزاری و سەقامگیری بۆ گەل دەستەبەربكات.
