بەڕێوەبەرایەتیی گشتیی تەندروستیی کەرکوک لەبارەی خۆڵبارینەوە هۆشداری لە بوونی ماددەیەکی مەترسیدار دەدات تێیدا کە هۆکارە بۆ چەندین کێشەی تەندروستی لەناویشیاندا تووشبوون بە جەڵتەی دڵ.
لە ڕاگەیەندراوێکدا تەندروستیی کەرکوک ئاشکرایکردووە، “ئەو شەپۆلی خۆڵبارینەی عێراقی گرتووەتەوە، هەڵگری ماددەی (pm2.5) كە دەبێتە هۆكاری توشبوون بە جەڵتە، كاریگەرییەكەشی هاوشێوەی چەوری سیانی-یە و زیان بە خوێنبەرەكان دەگەیەنێت”.
تەندروستی داوا لەهاوڵاتییان دەكات تەنها لەكاتی پێویستدا بچنەدەرەوە، ڕێنماییشیان دەکات ڕەچاوی پۆشینی دەمامک بكەن، ئەوانەشی نەخۆشیی ڕەبوویان هەیە پەمپی تایبەت لەگەڵ خۆیان هەڵگرن و بە بەردەوام یئاویان پێبێت بۆ ڕێگری لەوشكبوونی قورگیان.
بەپێی ئاماری تەندروستیی کەرکوک، لە کاتژمێر 5:00ی بەیانیی ئەمڕۆوە 137 کەس بەهۆی خۆڵبارینەوە تووشی حاڵەتی تەنگەنەفەسی بوون و سەردانی نەخۆشخانەکانیان کردووە.
