لەشكر حەمید، ئەندازیاری خۆراك ڕایدەگەیەنێت، جگەری ئاژەڵ و پەلەوەر كۆمەڵێك سوودی هەیە بۆ جەستەی مرۆڤ ڕێژەیەكی زۆر ڤیتامین B12 ی تێدایە كە سوودی هەیە بۆ زیادبوونی خوێن و یارمەتی دروستبوونی خڕۆكە سوورەكان دەدات و كاریگەری لەسەر تەندروستیی دەمارەكان هەیە، بەهای خۆراكی بەرزە و دەوڵەمەندە بە پڕۆتین، بە جۆرێك 18%بۆ 28%ی پڕۆتینە.
دەڵێت، “دەبێت هەمانكات ئاگاداربن جگەر ئامێری پاڵاوتنە لە لەشی ئاژەڵ یان مریشك و هەموو ئەو هۆرمۆن و دەرمانەی دەدرێت بەئاژەڵەكە یان مریشكەكە تێیدا كۆدەبێتەوە، ژەهر لەلەشدا كۆدەكاتەوە، بۆیە پێویستە دڵنیابین ئەو ئاژەڵە یاخود مریشكە ماوەیەكە هۆرمۆن و دەرمانی پێنەدراوە ئینجا بیخۆین.
بۆ ئەوانەی نەخۆشی دەردەشا (داو الملوك) یان هەیە جگەر گونجاو نییە چونكە بڕێكی زۆر ترشی یوریك دروستدەكات، ڕێژەیەكی زۆریش چەوری و كۆلیسترۆڵی تێدایە و بۆ ئەو كەسانە زۆر گونجاو نییە نەخۆشیی دڵ و بۆرییەكانی خوێنیان هەیە.
هەروەها جگەری بەستووی هاوردە نەبێت، چونكە ڕێژەیەكی زۆر نیتراتی سۆدیۆمی تێدایە لە هەندێك باردا زیان بە تەندروستی دەگەیەنێت.
