بە وتەی پەیامنێری سکای ئەڵمانیا، فلۆریان پلیتنبێرگ، یانەی بایرن میونشن بۆ مێرکاتۆی هاوینەی 2022 سادیۆ مانێی کردووەتە ئامانجی ژمارە یەک.
لیڤەرپول لە دانوستاندنەکان بۆ نوێکردنەوەی گرێبەستی یاریزانە سەنیگالییەکە دووچاری ئاستەنگی بووە و پرۆسەکە ماوەیەکە پەکی کەوتووە، لە کاتێکدا گرێبەستەکەی لە هاوینی 2023 کۆتایی دێت.
یانە زلهێزەکەی ئەڵمانیا دۆخەکەی قۆستووەتەوە و لەگەڵ لێپرسراوی کارەکانی مانێ دەستی بە گفتوگۆکردن کردووە، بەڵام لە نێوان یانەکانی بایرن و لیڤەرپوڵ هیچ دانوستاندنێک نەکراوە و سەرچاوەکان نازانن لیڤەرپوڵ تا چ ڕادەیەک ئامادەیە گوێبیستی ئۆفەرە پێشکەشکراوەکان بێت بۆ یاریزانی ناوبراو.
مانێ لە نیوەی دووەمی وەرزدا بە درێسی لیڤەرپوڵەوە باشترین ئاستی پێشکەش کردووە، و دوای گەڕانەوەی لە جامی نەتەوەکانی ئەفریقا 11 گۆڵی تۆمارکردووە، هەروەها سەرکردایەتی هەڵبژاردەی سەنیگالی کردووە لە بەدەستهێنانی ناسناوی جامی نەتەوەکانی ئەفریقا.
