دەستەی سەرۆكایەتیی ئەنجومەنی نوێنەرانی عێراق بڕیاریدا كە وەرزی یاسادانان بۆ ماوەی یەك مانگ درێژبكاتەوە و ئەم هەفتەیەش ئەو پڕۆژەیاسایە بخاتە كارنامەی دانیشتنەكانی پەرلەمانەوە كە سەدرییەكان پێشنیازیانكردووە و بارزانی لێیدەترسێت.
فەرمانگەی ڕاگەیاندنی ئەنجومەنی نوێنەرانی عێراق لە ڕاگەیەندراوێكدا ئاماژەی بەوەكردووە، ئەمڕۆ دەستەی سەرۆكایەتیی ئەنجومەنەكە كۆبووەتەوە و بڕیاردرا كە وەرزی یاسادانان بۆ ماوەی یەك مانگ درێژ بكرێتەوە، بەپێی بڕگەی دووەمی ماددەی 58ی دەستوور.
هەر لە كۆبوونەوەكەدا بڕیاردرا، ڕۆژانی چوارشەممە و پێنجشەممە ئەنجومەنی نوێنەران كۆبێتەوە و خوێندنەوەی یەكەم بۆ یاسای “تاوانی پەیوەندی لەگەڵ كیانی سەهیۆنی” بكرێت، هەروەها دەنگدان لەسەر یاسای پاڵپشتی ئاسایشی خۆراكی و پڕكردنەوەی ئەندامانی لیژنەكان بكرێت.
