بەپێی ناوەندێكی ئەوروپی تایبەت بە خۆپاراستن لە نەخۆشی، نزیكەی 95 حاڵەتی تووشبوون بە هەوكردنی جگەر لە 15 وڵاتی یەكێتیی ئەوروپا بڵاوبووەتەوە.
سەنتەری ئەوروپی بۆ خۆپاراستن لە نەخۆشی و ڕووبەڕووبوونەوەی (ECDC) ڕایگەیاند، تا 5ی ئایار نزیكەی 95 حاڵەتی هەوكردنی جگەری سەرچاوە نەزانراو لەناو منداڵانی 16 ساڵ و كەمتر لە 15 وڵاتی ناوچەی ئابوریی ئەوروپادا بڵاوبووەتەوە
زۆرینەی حاڵەتەكان لە ئیتاڵیا و ئیسپانیا بوون، 35 و 22 حاڵەت، لە هەریەك لە هۆڵەندا و دانیمارك شەش، لە ئیرلەندا-ش كەمتر لە پێنج حاڵەت هەیە، لە پورتوگال و ڕۆمانیا چوار لەهەر یەكێكیاندا هەیە، لە بەلجیكا سێ، دوو حاڵەتیش لە هەریەك لە نەمسا، قوبرس، فەرەنسا و نەرویج، لە هەریەك لە ئەڵمانیا، پۆڵەندا و سلۆڤینیاش هەر یەكێكیان حاڵەتێك تۆماركراوە.
دوێنێش دەسەڵاتدارێتیی تەندروستیی ئەمریكا ڕایگەیاند، لێكۆڵینەوە لە 109 حاڵەتی ناڕوونی هەوكردنی جگەر لای منداڵان لە ویلایەتە یەكگرتووەكاندا دەكات كە پێنج گیانلەدەستدانی لێكەوتووەتەوە.
پێشتر ڕێكخراوی تەندروستیی جیهانی ئاشكرایكرد، نزیكەی 230 حاڵەتی هەوكردنی جگەری سەرچاوە و بنەڕەت نەزانراو لە زیاتر لە 20 وڵاتدا هەیە.
بەپێی دوایین زانیارییە تەندروستییەكان كە لەلایەن شارەزایانی تەندروستیی بەریتانیاوە دەرچووە، ژیانكردن لەگەڵ “سەگی ماڵی” یان خواردنی حەبی “پاراسیتامۆڵ” هۆكاربوون بۆ تووشبوون بە هەوكردنی جگەر لای منداڵان.
