بەهۆی شەڕێكی خێڵەكییەوە هەشت كەس لە شارێكی عێراق كوژران.
دەزگا ئەمنییەكانی عێراق ئەمڕۆ چوارشەممە ڕایانگەیاند، دوو هۆزی ناحیەی عوزێر لە پارێزگای میسان بەشەڕهاتوون و جۆرەها چەكی سووك و مامناوەند لە دژی یەكدی بەكاردەهێنن و شەڕ تا ئێستا بەردەوامە.
بەپێی ئاماری بەرایی هێزە ئەمنییەكان، تا ئێستا هەشت كەس لە هەردوولا كوژراون و شەڕەكە پەیوەندی بە كێشەی كۆمەڵایەتی و دوژمنداریی كۆنی نێوان لایەنە بەشەڕهاتووەكانەوە هەیە.
دەزگا ئەمنییەكان لەبارەی وردەكاریی شەڕەكەوە دەڵێن، چەند چەكدارێك لەناو ئۆتۆمبێلێكەوە تەقەیان لە دوو كەس كردووە و بەهۆیەوە شەڕ و پێكدادان سەریهەڵداوەتەوە.
شەڕی نێوان هۆز و خێڵەكان لە شارەكانی ناوەڕاست و باشووری عێراق بووەتە دیاردە و ساڵانە دەیان ڕووداوی لەو جۆرە ڕوودەدەن و ژمارەی قوربانییەكانیان سەدان كەسن.
