سادیۆ مانێ یاریزانی لیڤەرپوڵ سوپاسی ئیدارەی یانەكە و كلۆپی ڕاهێنەری كرد كە هاوكاری زۆریان كردوون لە مانگی ڕەمەزاندا.
مانێ جەختی كردەوە كە ئیدارەی یانەكە هەموو كارئاسانییەكی كردووە بۆ ئەوەی بەشێوەیەكی باش مانگی ڕەمەزان تێپەڕێنن.
بەشێك لە وتەكانی مانێ:
سادیۆ مانێ بەم جۆرە باسی مانگی ڕەمەزان و ڕاهێنانەكانی لیڤەرپوڵ و یۆرگن كلۆپی ڕاهێنەر دەكات:
– یاریكردن و ڕاهێنان كردن لەگەڵ پابەند بوون بە ڕۆژ و مانگێ ڕەمەزانەوە كارێكی زۆر ئاستەمە.
– پێش دەستپێكردنی مانگی ڕەمەزان قسەمان لەگەڵ هیندرسۆنی كاپتن كرد بۆ ئەوەی گفتوگۆ لەگەڵ یۆرگن كلۆپ بكات تا كاتی ڕاهێنانەكانمان بۆ بگۆڕێت.
– ئێمە ویستمان ڕاهێنانەكان لە نیوەڕوان و ئێوارەوە بخەینە بەیانیان.
– بۆ ئێمە باشترە گەر ڕاهێنانەكان بەیانیان بێت، چونكە كاتی گەڕانەوەت دەبێت و دەتوانیت پشوو بدەیت، بەڵام گەر ڕاهێنانەكان ئێوارە بێت هیلاك دەبین و كاتی ڕۆژوو شكاندنیش تێدەپەڕێت.
– ڕاهێنەر بەداواكارییەكەمان ڕازیی بوو، ڕاهێنانەكانی خستە بەیانیان.
– بە دڵنیاییەوە ئێمە بەڕۆژوو دەبین لە ڕەمەزاندا بەڵام لیڤەرپوڵیش هەموو شتێكی بۆ ئاسان كردووین.
