ڤلادیمێر پوتین سەرۆكی ڕوسیا هەڕەشە دەكات و دەڵێت، هەر وڵاتێك پشتیوانیی ئۆكرانیا بكات وەڵامی خێرای جەرگبڕمان دەبێت.
دوایین لێدوانی ڤلادیمێر پوتین سەرۆكی ڕوسیا لەبارەی جەنگی ئۆكرانیاوە، هەڕەشەكردنە لە وڵاتانی خۆرئاوا و جەختدەكاتەوە، ڕێگەنادەن لایەنی سێیەم دەستوەردان لە ململانێی ئۆكرانیادا بكات.
سەرۆكی ڕوسیا ئەمڕۆ چوارشەممە لێدوانی بۆ ڕۆژنامەنووسان دا و وتی، “هێزی دەرەكی ئۆكرانیای هاندا ڕاستەوخۆ ڕووبەڕووی ڕوسیا ببێتەوە”.
پوتین هەڕەشەی لە وڵاتانی خۆرئاوا كرد و ڕایگەیاند، “بەرپەرچی ئاڵۆزترین هەڕەشە و ئاڵنگارییەكان دەدەینەوە، ڕێگەنادەین لایەنی سێیەم دەستوەردان لە ململانێی ئۆكرانیادا بكات و لەو دۆخەدا وەڵامی جەرگبڕ و خێرامان دەبێت”.
ڤلادیمێر پوتین وتیشی، “خۆرئاوا ئۆكرانیای لە وڵاتێكی دراوسێمانەوە كرد بە دوژمن و هەندێك وڵات ڕوسیا بە مەترسی دەبینن و پێیانوایە نابێت بوونی بمێنێت”.
