پاش نیوەڕۆی ئەمڕۆ لافاو لە چەند شەقام و گەڕەكێكی هەولێر دروستبوو، بەپێی زانیارییە سەرەتاییەكان زیان بە زیاتر لە دە ماڵ و چەندین ئۆتۆمبێلی هاوڵاتییان كەوتووە.
بەهۆی ئەو شەپۆلی بارانبارینەی چەند ڕۆژێكە هەرێمی كوردستانی گرتووەتەوە، پاش نیوەڕۆی ئەمڕۆ جارێكی دیكە لافاو لە هەولێر ڕوویدا.
پەیامنێرمان پێی ڕاگەیاندین، یەكێك لەو گەڕەكانی زیانی پێگەیشتووە (هیران سیتیی یەك)ە، ئاو و قوڕ و لیتە چووەتە زیاتر لە 10 ماڵەوە، چەند ئۆتۆمبێلێكیش ئاوی تێچووە و لافاو بردوویەتی.
هاوڵاتییەكی دانیشتووی گەڕەكەكە بۆ تۆڕی میدیایی ئێستا خۆشحاڵی خۆی دەردەبڕێت كە زیانی گیانی نەبووە، بەڵام زیانی ماددییان بەركەوتووە.
ئەو، كە پیشەی پێشمەرگەیە، دەڵێت، ئاو بە بەرزی 35 سم بەرزبووەتەوە و ئاماژەشدەدات، هیچ لایەنێكی پەیوەندیدار بەهانایانەوە نەچوون.
هاوڵاتییەكی دیكە دەڵێت، لافاوەكە كاتژمێر 3:15 خولەك لە ماوەیەكی كەمدا ڕوویدا و ڕوونیكردەوە، جگە لە ماڵەكان چەند ئوتۆمبێلێك زیانیان پێگەیشتووە و ئاو بردوونی، بەڵام گیراونەتەوە.
