وەزارەتی تەندروستیی هەرێمی كوردستان ئاماری 24 كاتژمێری بڵاوبوونەوەی پەتای كۆرۆنای بڵاوكردەوە و پێنجەم ڕۆژە گیانلەدەستدان بە كۆرۆنا تۆمارنەكراوە.
بەپێی ئامارێك كە وەزارەتی تەندروستی كەمێك لەمەوبەر بڵاویكردووەتەوە، لە ماوەی 24 كاتژمێری ڕابردوودا 1324 پشكنینی كۆرۆنا كراون و 27 كەس تووشی پەتاكە بوون.
ئامارەكە ئاشكرایكردووە، 54 تووشبووی تری كۆرۆنا چاكبوونەتەوە و بەوەش ژمارەی ئەو كەسانەی لە سەرەتای بڵاوبوونەوەی كۆرۆناوە تا ئێستا تووشی پەتاكە بوون و بە تەواوەتیی چاكبوونەتەوە، بۆ 429 هەزار و 164 كەس بەرزبووەتەوە.
لە 24 كاتژمێری ڕابردوودا، هاوشێوەی چوار ڕۆژی پێشتر هیچ كەسێك لە هەرێمی كوردستان بەهۆی كۆرۆناوە گیانی لەدەستنەداوە، وەك ئامارەكەی ئەمڕۆی وەزارەتی تەندروستی ئاشكرایكردووە.
