فیلمی سینەمایی ئەزموون یەكەم ڕۆژی جەژنی ڕەمەزان لە سەرجەم سینەماكانی هەرێمی كوردستان نیشاندەدرێت.
فوئاد جەلال، بەڕێوەبەری كۆمپانیای مەستی فیلم لە كۆنگرەیەكی ڕۆژنامەوانیدا ڕایگەیاند، فیلمی سینەمایی “ئەزموون” 35%ی بودجەكەی لەلایەن وەزارەتی ڕۆشنبیرییەوە دابینكراوە و 65%ی بودجەی فیلمەكە لەلایەن كۆمپانیایەكی ئەڵمانییەوە بووە.
ئاماژەی بەوە كرد، ماوەی شەش مانگ ئامادەكاری بۆ فیلمەكە كراوە و ئەكتەری زۆربەی شارەكانی هەرێمی كوردستان تیایدا بەشداربوون.
ئاشكرایكرد، فیلمەكە 30ی ئەم مانگە لە تەلاری هونەر لە شاری سلێمانی نیشاندەدرێت و لە یەكەم ڕۆژی جەژنی ڕەمەزاندا لە سینەماكانی (هەولێر، سلێمانی، دهۆك و كەركوك) نیشاندەدرێت.
بەڕێوەبەری كۆمپانیای مەستی فیلم وتی، “سپۆنسەری میدیاییمان بە هیچ دەزگایەكی ڕاگەیاندن نەداوە و سەرجەم دەزگاكانی ڕاگەیاندن دەتوانن ڕوماڵی فیلمەكە لەو ڕۆژانەدا بكەن”.
