هادی عامری سەرۆكی هاوپەیمانیی فەتح، لە دوایین هەوڵیدا بۆ نزیكبوونەوە لە موقتەدا سەدر ڕێبەری ڕەوتی سەدر پەیامێكی بڵاوكردەوە و ڕایگەیاند، “دەبێت خەونەكەی سەدر بەدیبهێنرێت” كە مەبەستی لە باوكی موقتەدا سەدرە.
لە ساڵیادی تیرۆركردنی محەمەد باقر سەدر باوكی موقتەدا سەدر ڕێبەری ڕەوتی سەدردا، هادی عامری سەرۆكی هاوپەیمانیی فەتح پەیامێكی بڵاوكردەوە و دەڵێت، لەم بۆنەیەدا “جەختدەكەینەوە لەسەر ویستمان بۆ ڕزگاركردنی عێراق لە مەینەتی بۆ كەشی ئازادی و بەدەستهێنانەوەی شكۆ و كۆتاییهێنان بە هەموو شێوەكانی پاوانخوازیی بیانی و گەندەڵی، هەروەها بەدیهێنانی خەونی شەهید سەدر كە خۆی لە هێنانەكایەی دەوڵەتێكی ئازادی دادپەروەردا دەبینێتەوە”.
عامری لە پەیامەكەیدا داوا لە هەموو “هێزە نیشتمانپەروەرەكان” دەكات میانڕەوی و نێوەندگیری زاڵبكەن و هەست بە بەرپرسیارێتی بكەن بەرامبەر گەل و نیشتمان و “هەوڵی جددی بدەن شكستپێهێنانی هەموو هەوڵە نەزۆكەكانی دوژمنان لەپێناو زیندووكردنەوەی دیكتاتۆرییەت و سەركوتكاری لەڕێگەی قۆستنەوەی ناكۆكییەكانی نێوان ڕۆڵەكانی یەك وڵاتەوە”.
