لیژنەی بەدواداچوونی وەزارەتی تەندروستیی هەرێم لەبارەی نەمانی دەرمان لە سلێمانی هۆشداریدەدات و ڕایدەگەیەنێت، لە ئێستادا تەنها نەشتەرگەرییە كتوپڕەكان ئەنجامدەدرێن و ئەگەر بودجەی پێویست تەرخاننەكرێت ڕەنگە لە ماوەی چەند هەفتەی داهاتوودا ئەوەش بووەستێت.
وەزارەتی تەندروستی بڕیاریدا بۆ بەدواداچوون لە كێشەی كەمیی دەرمان لیژنەیەكی مەیدانی سەردانی پارێزگای سلێمانی بكات و لە گرفتە تەندروستییەكان بكۆڵێتەوە. لە كۆنگرەیەكی ڕۆژنامەوانیدا، ئەندامانی لیژنەكە ئاماژەیان بەوە كرد، بەدواداچوونیان بۆ كێشەی كەمیی دەرمان لە سنووری پارێزگای سلێمانی كردووە و دەركەوتووە كێشەكە نەبوونی پارەی نەختینەیە لە بانكەكانی سلێمانی.
هاوكات لیژنەكە پێشنیازیكرد، بە پەلە بودجەیەكی پێویست بۆ سلێمانی تەرخانبكرێت چونكە لە ئێستادا تەنها نەشتەرگەرییە كتوپڕەكان ئەنجامدەدرێن و هۆشدارییاندا ئەگەر دۆخەكە چارەسەرنەكرێت، ڕەنگە لە ماوەی چەند هەفتەی داهاتوودا ئەوەش بووەستێت.
