لە ڕەمەزاندا خواردنەکانی سەر سفرەی ئێواران و پارشێوان جۆراوجۆرن، بەڵام گرنگە خۆراکەکان بەسوودبن و ڕێژەیەکی باشی ڤیتامین و ئاسن و ئەو شلەمەنییانەیان تێدابێت کە جەستە بە درێژایی ڕۆژەکە لێیان بێبەشبووە.
لە لایەکی دیکەشەوە هەندێک خواردنی ناتەندروست هەن کە پێویستە خۆتیان لێبەدووربگریت، چونکە کاریگەریی نەرێنییان لەسەر جەستە دەبێت.
بەپێی پێگەی ” okadoc” ئەمانەی خوارەوە هەندێکیانن.
خواردنە سوورەوەکراو و چەورەکان
بۆ نمونە پەتاتەی سوورەوەکراو، کە ئەگەرچی دەکرێت تامی خۆشبێت، بەهایەکی خۆراکیی بەرزی نییە و ڕەنگە تەنانەت واتلێبکات هەست بە ماندوویی و بێهێزییش بکەیت لە دواییدا، چونکە لە گەدەتدا شوێنی خۆراکە تەندروستەکانی داگیرکردووە.
هەروەها ترشیات و خواردەمەنییە سوێرکراوەکانیش نمونەکەی ترن، چونکە خوێی زۆر و سوێری دەبنە هۆی وشکبوونەوەی جەستە و هەستکردن بە تینوێتی.
شەکرەمەنییەکان
شیرینی و هەموو ئەو خواردنانەی ڕێژەی شەکریان بەرزە، هاوشێوەی جۆرەکەی پێشوو کالۆرییان بەرزە بەڵام بەهایەکی خۆراکیی بەرزیان نییە، چونکە وزەیەکی خێرا بە لەشت دەدەن و پاش ماوەیەکی کەم نامینێت.
کافایین
پێویستە خۆت لە سەرچاوەکانی کافایین بەدووربگریت، کە گرنگترینیان قاوە و چان. خۆبەدوورگرتنەکە بەوهۆیەوەیە، کافایین دەبێتە هۆی زیادکردنی پێویستیی چوون بۆ تەوالێت و ئەمەش وادەکات جەستەت شلەمەنی لەدەستبدات.
کاربۆهیدراتی سادە
باشتر وایە خۆت لە کاربۆهیدراتی سادەی وەک نانی گەنم و بەرهەمە هەویرییەکانی ئاردی سپیش بەدووربگریت، بەتایبەت لە پارشێودا. چونکە ئەم خۆراکانە بە زوویی هەرسدەبن و کاریگەرییەکیان بۆ ماوەیەکی کەم دەمێنێتەوە.
خواردنەوە گازییەکان
خواردنەوە گازییەکان ڕەنگە باری گەدەت تیکبدەن، بەتایبەتی گەر بە ساردی بخورێنەوە. بۆیە واباشترە خۆتان لێبەدووربگریت.
