بەڕێوەبەرایەتیی پۆلیسی سلێمانی بڵاویكردووەتەوە كەسێكیان بە تۆمەتەكانی وەرگرتنی سەرانە،هەڕەشە و تەقەكردن دەستگیركرد.
بەپێی ڕاگەیەندراوێكی بەڕێوەبەرایەتیی پۆلیسی سلێمانی، مەفرەزەكانی بنكەی پۆلیسی سەرچنار تۆمەتبارێكیان دەستگیركردووە كەلە دایكبووی ساڵی 1996ە بە پێی ماددەی 431 لەیاسای سزادان داواكراوبووە و لەلایەن هاوڵاتییەكەوە سكاڵای یاسای لەسەر تۆماركراوە كە هەڕەشەی كوشتنی لە سكاڵاكار كردبوو.
لە ڕاگەیەندراوەكە هاتووە، تۆمەتبار بەتۆمەتی تەقەكردن لەناو شاری سلێمانی بەپێی ماددەی 495 لە یاسای سزادان لەلایەن دادگاوە داواكراوبووە و دادوەر بڕیاری دەستگیركردنی بۆ دەركردووە.
ئاماژە بەوەكراوە” هاوڵاتییەكی دیكە سكاڵای یاسایی لەسەر هەمان تۆمەتبار تۆماركردووە بە تۆمەتی ئەوەی چۆتە دوكانەكەیەوە و داوای سەرانەو پارەی لێكردووە و بەپێی ماددەی 452 لەیاسای سزادانی عێراقی سكاڵای لەسەر تۆماركراوە و لە ئێستادا تۆمەتبار بە بڕیاری دادوەر ڕاگیراوەو لێكۆڵینەوەكان لەگەڵیدا بەردەوامە.
