مامۆستایان و فەرمانبەرانی بەشێک لە کۆلێژەکانی زانکۆی سلێمانی بەیانیی ئەمڕۆ سێشەممە، بایکۆتکردنی دەوامیان ڕاگەیاند و گردبوونەوەی ناڕەزاییان ئەنجامدا.
بەهۆی گردبوونەوەی مامۆستایان و فەرمانبەرانەوە ئێستا دەرگای سەرەکیی زانکۆی سلێمانی داخراوە.
لە ڕاگەیەندراویکدا مامۆستایان و فەرمانبەرانی زانکۆی سلێمانی ئاشکرایانکردووە، کە پێنەدانی مووچەکانیان یاریکردنێکی نایاساییە بە مافەکانیانەوە.
مامۆستایان و فەرمانبەران چەند داواکارییەکیان خستووەتەڕوو:
یەکەم: بایکۆتکردنی دەوام و هۆڵەکانی خوێندن بۆ هەموو ئاستەکان و ئامادەبوون بۆ گردبوونەوە و ناڕەزایی دەربڕین.
دووەم: پێدانی مووچەی مانگی دوو و سێ و مانگەکانی دیکە لەکاتی خۆیدا.
سێیەم: گەڕاندنەوەی مووچە و شایستە نەدراوەکان لە مووچەی پاشەکەوتکراو و شایستەکانی دیکە.
چوارەم: گەڕاندنەوەی پلەبەرزکردنەوە.
مامۆستایان و فەرمانبەران ڕایانگەیاندووە، تاوەکو ئەو داواکارییانەیان بەشێوەی کرداریی بۆ جێبەجێبەکرێت ناگەڕێنەوە هۆڵەکانی خوێندن، هیچ بەرپرسیارێتییەکی پەککەوتنی خوێندن لەئەستۆناگرن.
تائێستا مامۆستا و فەرمانبەرانی 10 کۆلێژ مووچەی مانگی شوباتیان وەرنەگرتووە، هۆکارەکەشی نەبوونی نەختینەیە لە بانکەکاندا.
