توێژینەوەیەکی نوێ زیانە تەندروستییەکانی ژیانی شار و سوودەکانی مانەوەی لە نزیکی سروشتدا دەرخستووە.
ژیان لە نزیکی سروشت و سەوزاییەکاندا و دوورکەوتنەوە لە شارەکان چەندین سوودی تەندروستیی هەیە و ڕۆژ دوای ڕۆژ ئەو سوودانە زیاتر دەردەکەون، نوێترینیان بەپێی “دەیلی نیوز” ئەنجامی توێژینەوەیەکە دەریدەخات ژیان لە سروشت و سەوزاییەکاندا بە نزیکەی لە سەدا 16 ئەگەری جەڵدەی مێشک کەمدەکاتەوە.
لە شارەکاندا، بەهۆی هۆکار و ئامێرەکانی گواستنەوەوە ڕێژەیەکی زۆری دووەم ئۆکسیدی نایترۆجین هەیە و هەڵمژینی بەردەوامی ئەم پێکهاتەیە ئەگەری جەڵدەی مێشک زیاد دەکات.
بە پێچەوانەشەوە سروشت و سەوزایی بە شێوازی جیاجیا سوود بە تەندروستی دەگەیەنن، وەک کەمکردنەوەی خەمۆکی و شڵەژان، دابینکردنی شوێنی گونجاو بۆ وەرزش و پاراستنی تەندروستیی مێشک.
هەروەها بەپێی پێگەی “سایێنس ئەلێرت”، پێویستە ڕوو لە شار و گوندی ژینگەدۆستانەتر بکەین، تاکو خۆمان لە تووشبوون بەو نەخۆشییانەی سەرچاوەکەیان پیسبوونی ژینگەیە، بەدووربگرین.
