سەركردەیەكی چێوەی هەماهەنگی هەنگاوی نوێ لەبارەی لێكتێگەیشتنی نێوان ڕەوت و چێوە ئاشكرادەكات.
فازل فەتلاوی سەركردە لە چێوەی هەماهەنگی (كۆكراوەی هێز و لایەنە شیعییەكانی دەرەوەی ڕەوتی سەدر) ڕایگەیاند، وتووێژەكان تائێستا لەنێوان چێوەی هەماهەنگی و ڕەوتی سەدر بەردەوامە، گەیشتووەتە قۆناغی پێشكەوتوو كە ئەنجامەكەی لە دوو ڕۆژی داهاتوودا دەردەكەوێت.
فەتلاوی لە لێدوانێكدا بۆ میدیا عێراقییەكان پێشبینی خۆی نیشاندا بەوەی “لەماوەی دوو ڕۆژی داهاتوودا ڕووانینێكی هاوبەش و ڕێككەوتن لەنێوان چێوە و ڕەوت دێتە ئاراوە بۆ چوونە ئەنجومەنی نوێنەران وەك گەورە فراكسیۆنێكی یەكگرتوو”.
بڕیارە شەممەی داهاتوو 26ی ئازار كۆبوونەوەی ئەنجومەنی نوێنەرانی عێراق بۆ هەڵبژاردنی سەرۆك كۆمار بەڕێوەبچێت، بەڵام ناكۆكی نێوان هێزە شیعییەكان لەلایەن و هێزە كوردییەكان لەلایەكی دیكە ئاستەنگی بەردەم بەڕێوەچوونی پرۆسەكەن.
