وەزارەتی بازرگانی، بڕی گەنمی پێویست بۆ دابینكردنی بەشە ئاردی مانگانەی هاوڵاتییان دابیندەكات و دەڵێت، بەشی دوو مانگ بەردەستە.
كەشتییەك گەنمی ئەمریكی گەیشتووەتە عێراق بە مەبەستی كردنی بە ئارد و وەزارەتی بازرگانیی عێراق ئاشكرایكرد، دوو كەشتیی دیكەی گەنم لە رۆژانی داهاتوودا دەگەن.
ئەمڕۆ شەممە، وەزارەتی بازرگانیی عێراق رایگەیاند، 100 هەزار تۆن گەنمی ئەمریكی گەیشتووە بە كۆگاكان و دوو كەشتی دیكە گەنم لە رۆژانی داهاتوودا دەگەن و لەگەڵ گەنمی ناوخۆدا تێكەڵدەكرێن بۆ دروستكردنی بەشەئاردی مانگانەی هاوڵاتییان.
بەپێی راگەیەندراوی وەزارەتەكە، دوو ملیۆن و 200 هەزار تۆن گەنمی خۆماڵی لە جوتیاران كڕدراون و بە تێكەڵكردنیان لەگەڵ گەنمی ئەمریكیدا بە رێژەی 50 بە 50 ئاردیان پێدابیندەكرێت و ئاشكرایكرد، مانگانە عێراق پێویستی بە 460 هەزار تۆن گەنمە بۆ دابینكردنی ئارد بۆ هاوڵاتییان و ئێستا بەشی دوو مانگ گەنم بەردەستە.
