قائیمقامی قەزای ماوەت ڕایدەگەیەنێت، ” گەنجێك لە نزیك چەمی خەموڵەكەی قەزای ماوەت كەوتووەتە نێو ئاوی چەمەكەوە و دوو گەنجی دیكەش كە لەگەڵ ئەو گەنجەدا بوون بۆ ڕزگاركردنی خۆیان هەڵداوەتە نێو ئاوەكەوە و چارەنووسان نادیارە”.
كامەران حەسەن، قائیمقامی قەزای ماوەت لە لێدوانێكدا بەتۆڕی میدیایی ئێستای ڕاگەیاند، ئێوارەی ئەمڕۆ دووشەممە، گەنجێك لە شوێنێكی سەخت نزیك چەمی خەموڵەكە لە قەزای ماوەت كەوتووەتە نێو ئاوی چەمەكەوە و دوو گەنجی دیكەش كە لەگەڵ ئەو گەنجەدا بوون بۆ ڕزگاركردنی خۆیان هەڵداوەتە نێو ئاوەكەوە و تاوەكو ئێستا چارەنووسی هەرسێكیان نادیارە و بێسەر و شوێنن.
ئاماژەی بەوەكرد، “هەرسێ گەنجەكە تەمەنیان لە نێوان 25 – 30 ساڵدايە و خەڵكی گوندی “بەریسماق”ی قەزای ماوەتن”.
قائیمقامی قەزای ماوەت باسی لەوەكرد، “چاوەڕوانی ڕۆژهەڵاتن دەكەن و بڕیارە سبەینێ بەیانی تیمەكانیان دەست بە گەڕان لەو شوێنانە بكەن”.
