داواكاری گشتیی هەرێم داوای لێكۆڵینەوە لە هۆكاری گیانلەدەستدانی پێشمەرگە خانەنشینەكەی ئەمڕۆی قەزای سۆران دەكات كە لە سەرەی وەرگرتنی مووچە گیانیلەدەستدا، هاوكات داوای گۆڕینی میكانیزمی دابەشكردنی مووچەی خانەنشینان-یش دەكات.
بەپێی ڕاگەیەندراوێكی داواكاری گشتیی هەرێم ئەمڕۆ دووشەممە بڵاویكردووەتەوە ” دوای بڵاوبوونەوەی هەواڵی گیانلەدەستدانی خانەنشینێك لە قەزای سۆران لەكاتی وەرگرتنی مووچەكەی، داواكاری گشتیی، دادوەری داواكاریی گشتی لە سۆران ڕاسپارد بۆ بەدواداچوونی ئەم بابەتە لە ڕووی كارگێری و یاساییەوە.
لە ڕاگەیەندراوەكە هاتووە، ” داوای پێكهێنانی لیژنەیەكی لێكۆڵینەوە كراوە بۆ خستنەڕووی ڕاستی ئەم بابەتە و ئاشكراكردنی كەمتەرخەمان بۆ بەدواداچوونی یاسایی”.
ئاماژە بەوە كراوە ، “داواكاری گشتیی داوا لە وەزیری دارایی دەكات میكانزمێكی گونجاو بۆ دابەشكردنی مووچەی خانەنشیان لە داهاتوودا پەیڕەو بكات تا كارەساتی لەم جۆرە دووبارە نەبێتەوە.”
