وەزارەتی دارایی هەرێم ڕایدەگەیەنێت، وەزارەتەكەیان بە هیچ شێوەیەك هیچ بانكێكی سلێمانی و بانكی ناوەندیی هەرێم – سلێمانی ناچارنەكردووە هەموو داهاتی ناوخۆ بدات بە مووچە، دەشڵێت، فرۆشتنی نەوت هەڵەی تێدابووبێت، لە كابینەكانی پێشوو بووە نەك كابینەی نۆیەم.
لە ڕوونکردنەوەیەکدا، كە دیار نییە وەزیری دارایی ئاگاداریەتی یان نا، وەزارەتی ناوبراو ڕایگەیاندووە، “وەزارەتی دارایی و ئابوری بە هیچ شێوەیەك هیچ بانكێكی سلێمانی و بانكی ناوەندی هەرێم – سلێمانی ناچارنەكردووە هەموو داهاتی ناوخۆ بدات بە مووچە، بەڵکو ئەنجومەنی وەزیران و وەزارەتی دارایی ئەولەویەتی داوە بە دابەشکردنی مووچە”، ئەو داهاتەشی كە ماوەتەوە بەكارهاتووە بۆ پێداویستییەكانی تر، وەك ئەوەی وەزارەتی دارایی دەڵێت.
هەر لەو ڕوونكردنەوەیەدا، كە وەكو وەڵامێك بۆ ئەندامێكی سەركردایەتیی یەكێتی بڵاویكردووەتەوە، كابینەی نۆیەم لە سیاسەتی نەوت بێبەری دەكات، دەڵێت، “ئەگەر لە فرۆشتنی نەوت هەڵەیەك هەبووبێت لە كابینەكانی پێشوو بووە، نەك كابینەی نۆیەم”.
وەزارەتی دارایی دووبارە ئەوەشی ڕاگەیاندووە، كە تەنیا بەرپرس و ئاگاداری ئەو بڕە داهاتەی نەوتە، كە مانگانە دەچێتەوە بۆ وەزارەتەكە.
ئەو ڕوونكردنەوەیەی وەزارەتی دارایی لە كاتێكدایە، ئاوات شێخ جەناب وەزیری دارایی بەهۆی نیگەرانی و ناڕازیبوون، ماوەیەكە نەچووەتەوە سەر كار و هەندێك لە كارەكانی لە سلێمانییەوە ڕاییكردووە، داواشیكردووە گۆڕان كەسێكی دیكە بۆ پۆستەكە دیاریبكات.
وەزیری دارایی لەوە نیگەرانە كە مەسرور بارزانی سەرۆكی حكومەتی هەرێم زیاتر لە جارێك ڕایگەیاندووە، وەزیری دارایی ئاگای لە تەواوی داهاتی نەوتە.
