هاوپەیمانیی دەوڵەتی یاسا بە سەرۆكایەتیی نوری مالكی، داوا لە موقتەدا سەدر ڕێبەری ڕەوتی سەدر دەكات دەرگاكان بەڕوویدا بكاتەوە و لەگەڵیدا ڕێكبكەوێت و پێكەوە سەرۆك وەزیران دەستنیشانبكەن.
عەباس مالكی پەرلەمانتاری عێراق لە هاوپەیمانیی دەوڵەتی یاسا ڕایگەیاند، “باشترین بژاردە بۆ قۆناغی داهاتوو، پێكهێنانی بڕیاری شیعی و ڕێككەوتنی چێوەی هەماهەنگی و ڕەوتی سەدرە”.
مالكی لە لێدوانێكی ڕۆژنامەوانیدا وتی، “ڕێككەوتن باشترین بژاردەیە و هێشتا چاوەڕوانی دەستپێشخەریی “نیازباشی” لە ڕەوتی سەدر دەكەین”.
بەپێی وتەی مالكی، چێوەی هەماهەنگی چاوەڕوانە ڕەوتی سەدر هەموو دەرگا داخراوەكانی نێوان هەردوولا بكاتەوە و گەورەترین فراكسیۆن پێكبهێنن و سەرۆك وەزیران دەستنیشانبكەن.
ئەو ڕێككەوتنی نێوان چێوەی هەماهەنگی و ڕەوتی سەدر، بە تاكە ڕێگەی چارەسەركردنی یەكجارەكیی كێشەكان و كۆتاییهێنان بە داخرانی سیاسی دەزانێت.
