فەرماندەی هێزەکانی پێشمەرگە لە شنگال و کارگێڕی لقی 17ی پارتی دەست لەكاركێشانەوەی خۆی لە پۆستەكەی و پارتی ڕادەگەیەنێت.
قاسم شەشۆ، فەرماندەی هێزەکانی پێشمەرگە لە شنگال و کارگێڕی لقی 17ی پارتی دیموكراتی كوردستان ئەمڕۆ دووشەممە 16ی تشرینی دووەم لە تۆمارێكی ڤیدیۆیدا دەست لەكاركێشانەوەی خۆی لەو حزبە و پۆستە سەربازییەكەی ڕاگەیاند.
شەشۆ، هۆكاری بڕیارەكەشی بۆ پرس پێنەكردنی لە دانانی بابە شێخ-دا گەڕاندەوە.
شەممەی ڕابردوو لە كۆبوونەوەی میری كوردانی ئێزدی-دا بڕیاردرا، شێخ عەلی ئیلیاس حەجی ناسر (41 ساڵ) وەك بابەشێخی ئێزدییان دیاریبكرێت دوای ئەوەی شێخ خرتۆ حاجی ئیسماعیل، بابەشێخی پێشوو و ڕابەری رۆحیی ئێزدییەكان لە 1ی تشرینی یەكەمی ڕابردوو لە تەمەنی 87 ساڵیدا بە نەخۆشی كۆچی دواییكرد.
بڕیاریشە ڕۆژی چوارشەممە لە ڕێوڕەسمێكدا لە پەرستگای لالش، شێخ عەلی ئیلیاس دەستبەكارببێت و وەك بابەشێخی ئێزدییەكان كاروباری ئێزدییەكان بگرێتەئەستۆ.
