سەرۆكی ڕوسیا فەرمان بە سوپای وڵاتەكەی دەكات كۆمارەكانی لۆگانسك و دۆنیتسك بپارێزن.
دوای ئەوەی شەوی ڕابردوو ڤلادیمێر پوتین سەرۆكی ڕوسیا نووسراوی داننان بە كۆمارەكانی لۆگانسك و دۆنیتسك-ی ئۆكرانیای واژووكرد، بەپێی فەرمانەكەی سەرۆكی ڕوسیا، “هێزە چەكدارەكانی ڕوسیا ئۆپەراسیۆنی پاراستنی ئاشتی” ئەنجامبدەن لە خاكی هەریەكە لە كۆمارەكانی لۆگانسك و دۆنیتسك.
فەرمانەكەی پوتین بۆ سوپای وڵاتەكەی دوای ئەوە دێت، كە گوایە سەرۆكەكانی هەردوو كۆمارەكە داوایان كردووە بەپێی هەردوو ڕێككەوتنی “هاورێیەتی و هەماهەنگی” و “یارمەتیی دوولایەنە”، كە پێشتر لەنێوان كۆمارەكان و مۆسكۆدا واژووكراون.
پوتین لە نووسراوەكانی داننان بە كۆمارەكاندا فەرمانی بە وەزارەتی دەرەوەی وڵاتەی كردووە گفتوگۆ لەگەڵ دەسەڵاتی لۆگانسك و دۆنیتسك بكەن لەبارەی دروستكردنی پەیوەندیی دیپلۆماسی و واژووكردنی ڕێككەوتن لەگەڵیان.
دیار نییە دوای ئەو فەرمانە، سوپای ڕوسیا دەست بە پێشڕەوی بەرەو خاكی ئۆكرانیا و دوو كۆمارە دانپێدانراوەكە دەكات، یان نا.
