سەرۆکی ڕوسیا ڤلادیمێر پوتین مەرسومی داننان بەسەربەخۆیی هەردوو ناوچەی لۆگانسک و دۆنیتسکی هەرێمی دۆنباسی سەربە ئۆکرانیای واژووکرد.
میدیاکانی ڕوسیا بڵاویانکردەوە، ڤلادیمێر پوتین بە ئامادەبوونی دینیس پوشلین سەرۆك كۆماری دۆنیتسك و بیۆنید پاشیچنیك سەرۆك كۆماری لۆگانسك، مەرسومی دانپێدانانەکەی واژووکردووە.
لەگەڵ ئەوەشدا پوتین ڕێککەوتنی هاوکاری و یارمەتیدانی لەنێوان ڕوسیا و ئەو دوو وڵاتەدا واژووکرد.
پێشتر کۆشکی کریملن ڕایگەیاند، ڤلادیمێر پوتین داندەنێت بەسەربەخۆیی هەردوو ناوچەی دۆنیتسك و لۆگانسك لە هەرێمی دۆنباس کە لە ئۆکرانیا جیابوونەتەوە.
کۆشکی کریملن ئاشکرایکردبوو، “ڤلادیمێر پوتین پەیوەندییەکی تەلەفۆنیی لەگەڵ هەریەکە لە ئیمانوێل ماکرۆن سەرۆکی فەرەنسا و ئۆلاف شۆڵتز راوێژکاری ئەڵمانیا ئەنجامداوە، پێێراگەیاندوون کە لەداهاتوویەکی نزیکدا مەرسوومی تایبەت بە دانپێدانانی ئەو دوو ناوچەیە واژوودەکات”.
هەر ئەمڕۆش دینیس پوشلین سەرۆك كۆماری دۆنیتسك و بیۆنید پاشیچنیك سەرۆك كۆماری لۆگانسك كە هەردوو وڵاتەکە ساڵی 2014 لە ئۆكرانیا جیابوونەتەوە و هیچ وڵاتێك تا ئێستا دانی پێدانەناون، لە دوو پەیامی ڤیدیۆییدا داوایان لە ڤلادیمێر پوتین سەرۆكی ڕوسیا كرد دان بەو دوو وڵاتەدا بنێت و لە كاروباری بەرگری و سەربازیدا زیاتر هاوئاهەنگبن.
ئێوارەی ئەمڕۆ پوتین لەگەڵ هەردوو ئەنجومەنی دۆما و ئاسایشی ڕوسیادا لەبارەی ئەو دوو داوایەوە كۆبووەوە. دوای كۆبوونەوەكە ڕایگەیاند، هەر ئەمڕۆ لەبارەی داننان بە سەربەخۆیی هەردوو كۆماری دۆنیتسك و لۆگانسك-ـەوە بڕیاردەدات.
