تەندروستیی چەمچەماڵ هۆشداری دەدات لە ئەگەری بڵاوبوونەوەی نەخۆشیی كوشندە، ئەوەش بەهۆی كۆبوونەوەی خۆڵ و خاشاكەوە.
بەڕێوەبەرایەتیی تەندروستیی چەمچەماڵ نووسراوێكی ئاراستەی قائیمقامیەتی شارەكە كردووە، ئاگاداریدەكاتەوە لە مەترسیی بڵاوبوونەوەی “نەخۆشیی كوشندەی گواستراوە”، لە ئەنجامی كەڵەكەبوونی ئەو خۆڵ و خاشاك و پاشماوە جۆراوجۆرانەی لەناو شار كۆڵان و شەقامەكان فڕێدراون و پاكنەكراونەتەوە.
ماوەیەكە بەهۆی خەرجنەكردنی پارەی كۆمپانیاكانی پاككەرەوە لە سلێمانی و هەڵەبجە و ئیدارەكانی گەرمیان و ڕاپەڕین لەلایەن حكومەتی هەرێم و وەزارەتی داراییەوە، كۆمپانیاكان مووچەی ژینگەپارێزەكانیان نەداوە و ئەوانیش بایكۆتی كارەكانیان كردووە، بۆیە خۆڵ و خاشاك لە زۆرێك لە شوێنەكان كۆبووەتەوە.
