سەرچاوەکانی هەواڵ لە بەریتانیاوە ئاشکرایانکردووە، سێ یانەی گەورە و ناوداری ئەوروپا خواستیان لەسەر گواستنەوەی کریستیانۆ ڕۆناڵدۆ نیشانداوە.
بەپێی زانیارییەکانی ڕۆژنامەی “زە سەن”، کریستیانۆ ڕۆناڵدۆ لە یانەی مانچستەر یونایتد بێزارە و پێیوایە یانەکە لەئێستادا هاوشێوەی ڕابردوو گوڕوتینی سەرکەوتن و چنینەوەی ناسناوەکانی نەماوە، بۆیە بڕیاریشیداوە ئەگەر لە کۆتایی وەرزدا نەتوانن پێگەیەکی بەشدار لە خولی یانە پاڵەوانەکان بەدەستبهێنن، ڕاستەوخۆ ڕوو لە یانەیەکی دیکە بکات.
سەرچاوەکە لەزاری سەرچاوە ناوخۆییەکانی یونایتدەوە ئاشکرایکردووە، یانەکانی پاریس سان جێرمان، بایرن میونشن و ڕۆما خواستیان لەسەر کڕینی دۆنی پۆرتوگال نیشانداوە.
کریستیانۆی تەمەن 37 ساڵ هاوینی ڕابردوو لە یانەی یوڤانتۆسەوە پەیوەندی بە مانچستەر یونایتدەوە کرد، تاوەکو ئێستا 28 یاری بەدرێسی سوورەوە کردووە و 15 گۆڵی تۆمارکردووە و سێ گۆڵی بۆ هاوڕێکانی ڕەخساندووە، بۆندەکەی لە هاوینی 2023 کۆتاییدێت.
