ڕێكخراوی هیومان ڕایتس وۆچ داوا لە ئێران دەكات چاكسازی لە پڕۆژەیاسای توندوتیژیی دژ بە ژناندا بكات، ئەمەش دوای كوشتنی كچێكی (17 ساڵ) و سەربڕینی لەلایەن هاوسەرەكەیەوە لە هەرێمی خوزستان.
ڕێكخراوەكە لە ڕاپۆرتێكدا دەڵێت، ناونیشانی ڕۆژنامەكان دەربارەی سەربڕینی غەزالە (مونا) حەیدەریی (17 ساڵ) ڕۆژی شەممە كۆمەڵگای ئێرانیان هەژاند. پۆلیس هاوسەری قوربانییەكە و هاوسەری خوشكەكەی دەستگیركرد كە دەڵێن، پاڵنەری كارەكە ناكۆكیی خێزانییە، لەكاتێكدا ڕاپۆرتەكان ئاماژە بەوە دەكەن كە حەیدەری، كە لە هەرێمی خوزستان نیشتەجێبووە، هاوسەرگیری لەگەڵ ئامۆزاكەی كردووە لە تەمەنی 12 ساڵیدا و منداڵێكی لێیبووە (3 ساڵان).
بەپێی سەرچاوە نزیكەكان لە قوربانییەكە، حەیدەری هەوڵی هەڵهاتنی داوە لە توندوتیژیی خێزانی بە هەڵهاتن بەرەو توركیا، بەڵام كەسە نزیكەكانی بۆ ئێران گەڕاندوویانەتەوە.
سەرچاوە میدیایی و مافدۆستەكان باس لە بوونی پیاوێك دەكەن، كە باوەڕوایە هاوسەری بێت، وێنەی گیراوە كاتێك لە شەقامەكانی شاری ئەهواز لە پارێزگای خوزستان لە گەڕاندایە و چەقۆیەك و سەری حەیدەریی بەدەستەوە بووە.
ڕێكخراوەكە داوای لە ئیدارە و پەرلەمانی ئێران كرد كاری پێشینە بدەنە چاكسازیكردن لە پڕۆژەیاسای توندوتیژیی دژ بە ژنان، بەجۆرێك گونجاوبێت لەگەڵ پێوەرە نێودەوڵەتییەكان بەر لە پەسەندكردنی.
