بینایەكی نیشتەجێبوونی 10 نهۆمی لە قاهیرەی پایتەخت داڕما و بەهۆیەوە ژمارەیەك هاوڵاتی گیانیان لەدەستدا و برینداربوون.
ڕوداوەكە بەرەبەیانی ئەمڕۆ شەممە 27ی ئازار لە ناوچەی پردی سوێس لە قاهیرەی پایتەختی میسر و نزیك لە وێستگەیەكی میترۆ ڕویداوە و بەهۆیەوە سێ كەس گیانیان لەدەستداوە و 23ی دیكەش برینداربوون.
بەپێی میدیاكان 40 ئۆتۆمبێلی فریاكەوتن گەیشتوونەتە شوێنی ڕوداوەكە و برینداربووانیان بۆ نەخۆشخانەكانی ناوچەكە گواستووەتەوە، گەڕانیش بەدوای كەسانی دیكەدا بەردەوامە.
لای خۆیەوە پارێزگاری قاهیرە بڕیاریدا لیژنەیەكی ئەندازیاری پێكبهێنرێت بۆ پشكنینی باڵەخانەكانی دەوروبەر و دەرخستنی كاریگەری داڕمانەكە لەسەریان و كۆكردنەوەی پاشماوەی بینا داڕوخاوەكە.
ڕوداوەكە لەكاتێكدایە دوێنێش دوای پێکدادانی دوو شەمەندەفەر لە باکوری شاری سوهاجی لە میسر گیان لە دەستدانی 32 کەس و برینداربوونی 66 کەسی دیکە لەلایەن وەزارەتی تەندروستی ئەو وڵاتەوە ڕاگەیەنرا.
ناوەندی سەرپەرشتیاری ڕێگەی ئاسنی لە میسر لەبارەی هۆکاری ڕوداوەکەوە ئاشکرایکردووە، “دوگمەی برێکی لەناکاو لەلایەن کەسێکی نەناسراوەوە ڕاکێشراوە و ئەوەش بووەتە هۆی وەستانی شەمەندەفەرەکە و دواتر شەمەندەفەری دووەم لە پشتەوە خۆی پێداکێشاوە و بووەتەهۆی دەرچوونی دوو فارغۆنی شەمەندەفەرە وەستاوەکە.
